Memwa 2010…

---

Lane demildis, tankou tout lòt ane pase

Men nan memwa ayisyen li p’ap efase

Nou pase tout ane a, n’ap konte kadav

Fè lèzot ap di ke Ayiti se yon kav.

Jounen an te sou pik li, solèy la vin tris

Latè pral tonbe sou cham Jilbriyis

Alsiyis Lanati pral fèl kaladja

Latè pral tranble kou fèy bwa

Chak gouyad lanati travèse lonbrit latè

Mache nan san l’, tankou mouch poze sou matyè

Nan tout pwofondè, latè ouvri goj li

Pou l’ bwè san n’ pandan l’ bouche zorèy li

Pousyè anvayi nou, benyen nou, kouvri nou

Nou pase plizyè jou, Bondye sove nan nou

Dlo k’ap koule nan je pou sila ki ale

Fè labou sou vizaj, ki raple sa nou ye.

Li lage nou debwabalanse, zo ak po

Kiyès k’ap ede n’ konte moun ki sou do

Moun k’ap rele, k’ap soufri kon kris sou lakwa,

Moun ki de men anlè, ki kwè y’ap jwenn viktwa ?

A! Demildis, mèsi.

Se pa sa ou te di,

Premye janvye parèt,

Solèy ap bay payèt

Tout moun rete tèt frèt

San espere kou trèt

Douz janvye t’ap vini

Pran moun san avèti

Ou mete nou toutouni nan kalfou landjèz

Ak Diyite n’ nan yon kwi, lemond ap ba n’ rèz

Moso Lespwa ki monte flim sou lestomak

Nou rele Satan Bondye pou yon pip tabak

Rèv sa twò long pou ti moso somèy nou

Somèy je louvri nan kalkile mizè nou

Ou ale ak yon moso nan chak ayisyen

Lespri nou vid men, nan lanmou, kè nou plen…

5 janvye 2020,  Letransparent